Mühacirləri ən çox hansı ölkələrdə sevirlər?
“Gallup” beynəlxalq sosioloji xidməti mühacirlərə münasibət indeksini açıqlayıb. Novator.az-ın məlumatına görə, reytinq 138 ölkədə keçirilən sorğunun nəticələrinə əsaslanıb. Sorğuya qatılanlara 3 hala münasibət bildirmək təklif olunub: a) mühacirlər sizin ölkənizdə yaşayır; b) mühacir sizə qonşu olur; c) mühacir sizin yaxın qohumunuzla ailə qurur.
Bu və ya digər halı yaxşı qiymətləndirməyə 3 bal, pis qiymətləndirməyə 0 bal verilib, sonra orta bal müəyyənləşdirilib.
Reytinqə əsasən, mühacirlərə münasibətin ən yaxşı olduğu ölkələr İslandiya (orta bal 8,26), Yeni Zelandiya (8,25) və Ruandadır (8,16).
Mühacirlərə ən kəskin münasibət Makedoniya (1,47), Monteneqro (1,63) və Macarıstanda (1,69) qeydə alınıb.
Azərbaycan mühacirlərə münasibət reytinqində 4,34 bal alıb. Ölkə indeksdə Ermənistan (5,78), Türkmənistan (5,36), Özbəkistan (4,9), Qırğızıstan (4,59) və Tacikistandan (4,39) geri qalır.
Keçmiş SSRİ məkanında mühacirlərə münasibətin ən pis olduğu ölkələr Latviya (2,04), Estoniya (2,37) və Rusiyadır (2,60).
