Gürcüstanda səs-küy norması
Gürcüstanda “Yaşayış evlərində, ictimai yerlərdə və ərazilərdə akustik səs-küy normaları haqda” texniki reqlament qüvvəyə minib.
Novator.az xəbər verir ki, yeni reqlamentə əsasən, yaşayış evlərində gündüz vaxtı səs-küy səviyyəsi maksimum 35 desibel, axşam və gecə saatlarında isə 30 desibel ola bilər. Otel və qonaq evlərində səs-küyün maksimum həddi gündüz 40 desibel, axşam və gecə 35 desibel müəyyən olunub.
Stasionar tibb müəssisələrindəki müalicə və reabilitasiya palatalarında səs-küyün icazə verilən maksimum həddi gündüz 35, gecə 30 desibeldir. Müalicə kabinetlərində isə səs-küy gecə və gündüz 40 desibeli aşmamalıdır.
Yeni reqlamentə görə, ticarət obyeklərində, restoran, kafe və barlarda səs-küy ən çoxu 55 desibel, konsert və tamaşa zallarında 30 desibel, təhsil müəssisələrində və oxu zallarında 35 desibel, idman zallarında və hovuzlarda 40 desibel ola bilər.
Sahəsi 100 kvadratmetrədək olan ofislərdə səs-küy 40 desibeli, sahəsi 100 kvadratmetrdən çox olan ofislərdə 45 desibeli aşmamalıdır.
Səs-küy normasını pozana birinci dəfə xəbərdarlıq ediləcək. Normanı ikinci dəfə pozan fiziki şəxsi 150 lari (62 dollar), hüquqi şəxsi 500 lari (208 dollar) cərimə gözləyir. Normanı bundan sonra da pozanlar ikiqat cərimə olunacaq.
Reqlament Yeni il, 9 aprel və Gürcüstanın Müstəqillik Günü bayramları istisna olmaqla gecə saatlarında pirotexnikanın istifadəsini də yasaqlayır.
Səidə Hüseynova
