Əhali və maliyyə göstəriciləri
2017-ci ilin ilk yarısında Azərbaycan əhalisinin sayı 40 min 96 nəfər və ya 0,4 faiz artaraq iyulun 1-nə 9 milyon 850,1 min nəfərə çatıb. Dövlət Statistika Komitəsi belə hesabat yayıb.
Novator.az bildirir ki, rəsmi hesabata əsasən, əvvəlki ilin müvafiq dövrü ilə müqayisədə yanvar-iyul aylarında əhalinin gəlirləri nominal ifadədə 7,5 faiz artaraq 27 milyard 716,9 milyon manata yüksəlib.
7 ayda dövlət büdcəsinə 9 milyard 410,7 milyon manat vəsait daxil olub, büdcədən 9 milyard 765,6 milyon manat vəsait xərclənib. Büdcənin icrasında yaranmış 354,9 milyon manatlıq kəsir ümumi daxili məhsulun 0,9 faizi səviyyəsində olub.
İyulun 1-nə ölkənin bank və bank olmayan kredit təşkilatlarının kredit portfeli milli valyuta ekvivalentində 13 milyard 882 milyon manat təşkil edib. Ödəmə vaxtı keçmiş kreditlərin məbləği ümumi kredit portfelinin 13 faizinə bərabər olub.
Əhalinin banklardakı əmanətlərinin milli valyuta ekvivalentində məbləği iyul ayının 1-nə 6 milyard 907,1 milyon manat təşkil edib.
