Rusiyalıların dərd-səri
Ümumrusiya İctimai Rəyi Öyrənmə Mərkəzi ölkənin əsas problemlərinə dair sorğu keçirib. Novator.az-ın məlumatına görə, avqustun 14-də açıqlanan nəticələr göstərir ki, Rusiya əhlinin ən əsas problemi az maaş və ümumi yaşayış səviyyəsinin aşağı olmasıdır.
2017-ci ilin iyuluna olan vəziyyətə görə, Rusiya əhalisinin 24%-i həyat səviyyəsinin aşağı olmasından, 21%-i milli iqtisadiyyatın durumundan narahatdır. Əsas problemlər siyahısında üçüncü yerdə sosial siyasət (18%) gəlir.
Sosioloqların araşdırması 2014-cü ildən bəri Rusiyada yoxsulların sayının artdığını üzə çıxarıb. Onların fikrincə, ölkədə ən başlıca təhlükə qiymət artımıdır.
Rusiyada aşağı əməkhaqqı problemi artıq 3 ay ərzində birinci pillədə yer alır.
Sorğu iyulun 27-dən avqustun 1-nə qədər Rusiyanın 46 bölgəsinin 130 yaşayış məntəqəsində keçirilib. 1600 adamın qatıldığı sorğuda səhiyyənin durumu (17%), işsizlik (14%), təhsilin vəziyyəti (12%), pensiya azlığı (12%), inflyasiya (10%), korrupsiya (10%) əsas problemlər cərgəsində göstərilib.
Səidə Hüseynova
