Hər qarışı tarixin sirləriylə dolu Naxçıvanın möcüzəvi və şəfalı yerlərinfən biri Duzdağ mağarasıdır. Bəşər tarixinin ən qədim insan məskənlərindən olan bu şəfalı mağaranın dünyada tayı-bərabəri yoxdur. Duzdağ – Naxçıvanın rəmzlərindən biridir.

Duzdağ təkcə insanların qida tələbatının ödənilməsində, qida mədəniyyətinin formalaşmasında rol oynamayıb, o həm də şəfaverici rola malikdir. Naxçıvan Muxtar Respublikası Duzdağ Fizioterapiya Xəstəxanası 1979-cu ilin dekabrında Duzdağdakı qədim duz məbədlərinin bazasında yaradılıb.

Duzdağ Fizioterapiya Xəstəxanasının müalicəvi təsirinin digər duz şaxtalarından üstünlüyü ondadır ki, şaxta horizontal yerləşdiyindən xəstələr yeraltı aləmə təbii şəkildə adaptasiya ola-ola girirlər. Həm də şaxtakı ventilyasiya təbiidir və mikroorqanizmlər çox azdır.

Bu möcüzəli mağarada daima – istər yay, istər qış olsun – 17-18 dərəcə sabit temperatur hökm sürür.

Dəniz səviyyəsindən 1173 metr hündürlükdə yerləşən Fizioterapiya Mərkəzində əsasən allergiya, bronxit, astma xəstələri müalicə alırlar.

Dağın altına doğru 300 metr uzanan və divarları duz qayaları ilə örtülü Duzdağ Fizioterapiya Mərkəzində qadınlar və kişilər üşün xüsusi geyimlər var.

Dərmansız, öz havası ilə insanların dərdinə çarə olan bu mərkəz regionun ən böyük müalicəvi turizm obyektidir.

Hazırladı:
Rza ZEYNALLI,
15 yaş