İyulun 13-də Moskva Dairə Hərbi Məhkəməsi siyasətçi Boris Nemtsovun qətlində təqsirli bilinən Zaur Dadayevə 20 il həbs cəzası kəsib.

Rusiya müxalifətinin liderlərindən olan Boris Nemtsov 2015-ci il fevralın 28-nə keçən gecə Moskvada odlu silahla qətlə yetirilib.

İstintaqın versiyasına görə, 2014-cü ilin sentyabr ayında Ruslan Muxudinov Beslan Şavanova, Zaur Dadayevə, Şədid və Anzor Qubaşevlərə, Temirlan Əsgərxanova və Həmzət Baxayevə Boris Nemtsovu öldürməyin müqabilində 15 milyon rubl təklif edib.

2015-ci il fevralın 27-si axşam Zaur Dadayev Boris Nemtsovu güllələyib.

Zaur Dadayev, Şədid və Anzor Qubaşevlər, Temirlan Əsgərxanov və Həmzət Baxayev aparılan xüsusi əməliyyatlar nəticəsində saxlanıb, Beslan Şavanov Qroznı şəhərində ələ keçməmək üçün özünü qumbara ilə partladıb. Qətlin sifarişçisi və təşkilatçısı hesab olunan Ruslan Muxudinov isə beynəlxalq axtarışdadır.

Novator.az-ın məlumatına görə, məhkəmənin 13 iyul qərarı ilə Zaur Dadayevə 20 il həbslə yanaşı 100 min rubl cərimə kəsilib, o, leytenant rütbəsindən və İgidlik ordenindən məhrum edilib.

Məhkəmə Anzor Qubaşevə 19 il, Şədid Qubaşevə 16 il, Temirlan Əsgərxanova 14 il, Həmzət Baxayevə 11 il iş verib. Onların hər biri 100 min rubl cərimələnib.

Səidə Hüseynova