UEFA Çempionlar Liqasında Azərbaycanı təmsil edən “Qarabağ” klubu turnirə inamlı qələbə ilə start verib. İkinci mərhələdən mübarizəyə başlayan “Qarabağ” iyulun 11-i Bakıda, Tofiq Bəhramov stadionunda Gürcüstanın “Samtredia” komandasını 5:0 hesabı ilə məğlub edib. Cavab görüşü iyulun 18-i Tbilisidə keçiriləcək.

İyulun 14-ü üçüncü raundun püşkü atılacaq. Novator.az bildirir ki, “Qarabağ” komandası güclülər səbətində yer alır. “Samtredia” səddini keçəcəyi halda “Qarabağ”ın üçüncü mərhələdə Çexiyanın “Slaviya”, Rumıniyanın “Viitorul” klublarına rəqib olması mümkündür. Ağdam klubunun qarşısına Xorvatiyadan “Riyeka”, İsveçdən “Malmö”, Norveçdən “Rusenborq”, İsraildən “Hapoel” (Beer-Şeva), Serbiyadan “Partizan”, Qazaxıstandan “Astana”, Moldovadan “Şerif”, İslandiyadan “Hafnarfyordur” da çıxa bilərlər.