Qəhvə ölüm riskini azaldır
Qəhvənin qədərində qəbulu xərçəng və ürək xəstəliklərindən ölüm riskini azaldır. Novator.az-ın məlumatına görə, iki qrup tədqiqatçının 16 il ərzində 700 mindən artıq adamın üzərində apardığı araşdırma bunu göstərib.
Hər iki qrupun apardığı tədqiqat “Annals of İnternal Medicine” jurnalında dərc olunub.
521 min adamın iştirak etdiyi birinci tədqiqat göstərib ki, nə qədər çox qəhvə (kofeinli və ya kofeinsiz) qəbul edilərsə, bir o qədər xərçəng, insult, ürək xəstəliyi və qan dövranı ilə bağlı problemlərdən ölüm riski azalır. Əlavə olaraq daha 14 min adamın müayinəsini aparan tədqiqatçılar müəyyən ediblər ki, qəhvə həvəskarları daha sağlam qaraciyərə və möhkəm immunitetə malikdir.
215 min insanın məlumatlarını araşdıran ABŞ-ın Cənubi Karolina Universitetinin mütəxəssisləri də oxşar nəticələr alıblar. Onların əldə etdiyi nəticələrə görə, qəhvə qəbulu ürək, xərçəng, insult, diabet və böyrək xəstəliklərindən ölüm riskini azaldır. Alimlərin qənaətinə görə, gündə heç olmasa bir fincan qəhvə içənlərin vaxtsız ölüm riski ümumiyyətlə qəhvə içməyənlərdən 12% azdır. Gündə 3 fincan qəhvə içmək isə bu riski 18% azaltmış olur.
Səidə Hüseynova
