Azərbaycanın xarici ticarət tərəfdaşları
Dövlət Gömrük Komitəsi Azərbaycanın əsas xarici ticarət tərəfdaşlarının adlarını açıqlayıb. Novator.az-ın məlumatına görə, hesabatda bildirilir ki, 2017-ci ilin yanvar-iyun aylarında İtaliya ilə ticarətin həcmi ümumi dövriyyənin 15,61 faizini təşkil edib.
Türkiyə 13,71 faizlə ikinci, Rusiya 10,96 faizlə üçüncü tərəfdaş olub.
İxracda əsas ölkələrin siyahısında 23,11 faizlə İtaliya öndə gəlib. İdxalda əsas ölkənin isə Rusiya olduğu (19,4 faiz) bildirilir.
Yanvar-iyun aylarında Azərbaycanın MDB ölkələrinə ixracı 2016-cı ilin ilk yarısı ilə müqayisədə 49,93 faiz artıb. Avropa İttifaqı ölkələrinə ixracda 17,09 faiz, digər ölkələrə ixracda 62,1 faiz artım olub.
MDB ölkələrindən idxal 2016-cı ilin yanvar-iyun ayları ilə müqayisədə 0,26 faiz artıb. Avropa İttifaqından idxalda 28,33 faiz, digər ölkələrdən idxalda 16,68 faiz azalma var.
Ayrı-ayrı ölkələr üzrə göstəricilərə gəlincə, Ukraynaya ixrac 649,13 faiz, Qazaxıstana ixrac 79,32 faiz, Özbəkistana ixrac 56,03 faiz, Rusiyaya ixrac 51,94 faiz artıb. Digər MDB ölkələrinə ixracda azalma var.
Avropa İttifaqı ölkələrindən İtaliyaya ixrac 46,37 faiz, Yunanıstana ixrac 315,42 dəfə artıb. Almaniya, Böyük Britaniya, Fransa üzrə azalma qeydə alınıb.
Digər ölkələrə baxanda Çinə ixracın 23,22 dəfə, Avstraliyaya ixracın 525,55 faiz artdığı görünür. ABŞ-a ixrac isə ötən ilin ilk yarısı ilə müqayisədə 93,5 faiz azalıb.
