Alxanlıda ziyarət
İyulun 6-da xarici KİV nümayəndələri və hərbi attaşelər Füzulinin Alxanlı kəndində olublar. Onlar iyulun 4-ü erməni silahlı qüvvələrinin kəndi atəşə tutması nəticəsində həlak olan Sahibə Allahverdiyeva və onun 2 yaşlı nəvəsi Zəhra Quliyevanın qəbrini ziyarət ediblər. Nümayəndə heyəti hadisədə yaralanaraq hospitalda müalicə alan Alxanlı kənd sakini Səlminaz Quliyevaya da baş çəkiblər. Xəbəri AZƏRTAC yayıb.
Alxanlı kəndinə səfərdə TRT, “İhlas Haber Ajansı”, “Mir” Televiziyası, “Associated Press”, “RİA Novosti”, “Amerikanın səsi”, “İnterfax”, BBC və digər xarici KİV-in nümayəndələri, habelə 12 dövlətin 15 hərbi attaşesi və nümayəndəsi iştirak edir. Onların arasında ABŞ, Rusiya, Pakistan, Çin, Koreya, Türkiyə, Qazaxıstan, Çexiya, Ukrayna, Gürcüstan, Belarus hərbi nümayəndələri və Almaniyanın Azərbaycandakı səfirliyinin diplomatları var.
Səfəri Xarici işlər Nazirliyi, Müdafiə Nazirliyi, Baş Prokurorluq və Füzuli Rayon İcra Hakimiyyəti təşkil edib.
