“Karyerada ilk addım”: 200 iş yeri təqdim olundu
Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti Bakı Biznes Universitetində tələbə və məzunlar üçün “Karyerada ilk addım” devizi altında aktiv məşğulluq tədbiri keçirib. İyunun 30-da yayılan rəsmi məlumata görə, tədbirdə 3-ü dövlət, 44-ü özəl sektora aid 47 müəssisə 200 boş (vakant) iş yeri təqdim edib. Tələbə və məzunlara əmək bazarı, peşə və ixtisaslara olan tələblər haqqında məlumatlar verilib, işəgötürənlərlə ilkin əlaqələr qurmaq, işəgötürənlərə isə gələcəkdə müasir tələblərə cavab verən ixtisaslı kadrların seçimini aparmaq imkanı yaradılıb. Tədbir zamanı vakant iş yerlərinə göndərişlər verilib, habelə işəgötürənlər tələbə və məzunlardan şəxsi məlumatlar əks olunan CV-ləri qəbul ediblər.
Bu il 7 ali təhsil müəssisəsində “Karyerada ilk addım” devizi altında aktiv məşğulluq tədbirləri keçirilib. Bu tədbirlərdə 453 müəssisə 2,3 minədək vakant iş yeri təqdim edib.
