Hökm qüvvədə qaldı
Bakı Apellyasiya Məhkəməsi sabiq səhiyyə naziri Əli İnsanovun şikayəti üzrə prosesi başa çatdırıb. İyunun 22-də keçirilən iclasda şikayət təmin olunmayıb, Qaradağ Rayon Məhkəməsinin hökmü qüvvədə qalıb. Müdafiəçiləri sabiq nazirə bəraət verilməsini istəyirdilər.
Novator.az xatırladır ki, aprelin 26-da Qaradağ Rayon Məhkəməsi Əli İnsanovu 7 il 5 gün müddətinə azadlıqdan məhrum edib və 2005-ci ildə tutulmuş sabiq nazirin həbsi 2023-cü ilədək uzadılıb.
70 yaşlı Əli İnsanov tibb elmləri doktorudur. Səhiyyə naziri postunu 1993-2005-ci illərdə tutub.
2005-ci ilin oktyabr ayında dövlət çevrilişinə cəhd ittihamı ilə həbs olunan Əli İnsanov sonra iqtisadi cinayətlər ittihamı ilə 11 il müddətinə azadlıqdan məhrum edilib.
2016-cı il avqustun 24-də Qaradağ Rayon Prokurorluğu Əli İnsanova yeni cinayət işi qaldırıb. O, satış məqsədi olmadan qanunsuz olaraq psixotrop maddələri şəxsi istehlak miqdarından artıq miqdarda əldə etmə və ya saxlamada, hakimiyyət nümayəndəsinə xidməti vəzifələrini yerinə yetirərkən həyat və sağlamlıq üçün təhlükəli olan zor tətbiq etməklə müqavimət göstərmədə, cəzaçəkmə müəssisəsində qadağan olunmuş əşyaların saxlanmasında ittiham olunub.
İttihama görə, o, 2016-cı il avqustun 23-də xidməti vəzifəsini yerinə yetirən ədliyyə mayoru Anar Məmmədova zor tətbiq edib. Bəyan olunub ki, avqustun 23-də 13 saylı Cəzaçəkmə Müəssisəsində rejim qaydalarına baxış tədbirləri keçirilərkən Əli İnsanovda psixotrop maddə hesab edilən həblər, cəzaçəkmə müəssisələrində qadağan olunmuş güclü təsiredici dərman vasitəsi aşkar olunub, Penitensiar Xidmətin əməkdaşları protokol tərtib edərkən Əli İnsanov onlara mane olmağa cəhd göstərərək protokolu cırıb, hakimiyyət nümayəndəsinə qarşı zor tətbiq edib və sağlamlığı üçün təhlükəli xəsarətlər yetirib.
