Sabirabadda forum, güzəştli kreditlər
İqtisadiyyat Nazirliyinin Sahibkarlığa Kömək Milli Fondu iyunun 16-sı Sabirabad rayonunun Ulacalı kəndində işgüzar forum keçirib. Forumda Sabirabad və ətraf rayonlardan olan sahibkarlara 3,1 milyon manat güzəştli kredit verilib.
Rəsmi məlumata görə, vəsaitin bir hissəsi Sabirabad rayonunda ildə 109 milyon ədəd əmtəəlik yumurta və 1,4 min ton quş əti istehsal etmək gücündə olacaq müəssisənin tikintisinə yönəldiləcək. Müəssisə istifadəyə verildikdən sonra burada 130-a yaxın yeni iş yeri yaradılacaq. Ümumilikdə isə kreditlər əsasən pambıqçılıq, quşçuluq, heyvandarlıq və s. sahələrin inkişafına yönəldiləcək, investisiya layihələrinin reallaşdırılması 300-dən çox yeni iş yerinin açılmasına imkan yaradacaq.
Fondun icraçı direktoru Şirzad Abdullayev forumda deyib ki, ümumilikdə indiyədək Aran iqtisadi rayonunda fəaliyyət göstərən sahibkarlıq subyektləri 13 mindən çox investisiya layihəsinin maliyyələşdirilməsinə 524,4 milyon manat güzəştli kredit alıb.
Şirzad Abdullayev son illər 40 quşçuluq təsərrüfatına 133,3 milyon manat güzəştli kredit ayrıldığını vurğulayıb.
