Bu il mayın 27-də başlayan Ramazan ayının özəlliklərindən biri Qafqaz Müsəlmanları İdarəsinin Qazılar Şurasının fətvasında iftar vaxtından qabaq açılan ehsan süfrələrinin yolverilməz olduğu barədə xəbərdarlıqdır. Fətvada bildirilir ki, Ramazan ayı ərzində iftar vaxtından qabaq açılan süfrələrdə iştirak şəriətə görə böyük günahdır, bu xəbərdarlığı nəzərə almayan din xadimləri barəsində ciddi tədbirlər görüləcək.

Qafqaz Müsəlmanları İdarəsinin qadağası bir çox yerdə sərt şəkildə tətbiq olunur. Məsələn, Bakının Təzə Pir məscidində iftara qədər yas mərasimlərinə icazə verilmir. Başqa yerlərdə isə yas mərasimləri bəzən mollasız keçir.

Bakıdakı Məşədi Dadaş məscidinin axundu Hacı Şahin Həsənli Novator.az-a deyib ki, verilən fətvada hər hansı konkret qadağadan söhbət getmir: “Dinimizin qaydasına görə, Ramazan ayında iftardan əvvəl yemək vermək olmaz. Qafqaz Müsəlmanları İdarəsi də öz əməkdaşlarına hər hansı qadağa və ya qayda tətbiq edə bilər, elə din xadimlərinin ehsan mərasimlərində iştirakı kimi. Amma insanlar zorla dini qaydalara əməl etməyə məcbur edilmir. Sadəcə, əgər ölü yiyəsi dəfn mərasimini dinin tələblərinə uyğun həyata keçirirsə, onun digər məqamlarda da bu yolla hərəkət etməsi yaxşı olar.

Din xadiminin iştirakı ilə ölü dəfn edilir, amma din xadiminin ehsan süfrəsində iştirakı məcburi deyil. Kimsə bu qaydada ehsan vermək istəyirsə, edə bilər, bu onun öz işidir”.

Səidə Hüseynova