Asiyada dünya futbol çempionatının seçmə mərhələsinin növbəti oyunları keçirilib. Novator.az-ın məlumatına görə, B qrupunda yarışan Yaponiya İraqla səfər oyunundan 1:1 hesabı ilə dönüb. Yaponlar 8 turdan sonra 17 xalla qrupa başçılıq edir. Səudiyyə Ərəbistanı və Avstraliyanın 16 xalı var.
A qrupunda mübarizə aparan Cənubi Koreya isə səfərdə Qətərə 2:3 hesabı ilə məğlub olub. Bu qrupa 8 oyundan 20 xalla liderlik edən İran final mərhələsinə vəsiqə qazanıb. Cənubi Koreya 13 xalla ikinci, Özbəkistan 12 xalla üçüncüdür.
Qruplarda ilk iki yeri tutan komandalar dünya çempionatına birbaşa yollanır. Üçüncülərin öz aralarındakı oyunlarının qalibi isə Şimali və Mərkəzi Amerikanın təmsilçisi ilə üz-üzə gəlməlidir.
Şimali və Mərkəzi Amerika zonasında 6 komanda bir qrupda yarışır. 6 turdan sonra Meksika 14 xalla birinci, Kosta Rika 11 xalla ikinci, ABŞ 8 xalla üçüncüdür. Bu mövqelər dünya çempionatının final raunduna birbaşa vəsiqə verir.
7 xal toplayan Panama dördüncü pillədədir və Asiya təmsilçisi ilə üz-üzə gəlməyə namizəddir.
Final mərhələsi 2018-ci ilin iyun-iyul aylarında Rusiyada 32 komandanın iştirakı ilə keçiriləcək. İranla yanaşı Cənubi Amerikadan Braziliya dünya çempionatına vəsiqə alıb.
