Tereza Meyin kürsüsü laxladı
Böyük Britaniyada iyunun 8-də keçirilmiş növbədənkənar parlament seçkisinin ilkin nəticələri açıqlanıb. Novator.az bildirir ki, hakim Mühafizəkarlar Partiyası 650 yerlik İcmalar Palatasına 315 mandat qazanaraq mütləq çoxluğu itirib. Hökumət qurmaq üçün 326 mandat tələb olunur. Əvvəlki parlamentdə mühafizəkarların 330 deputatı vardı.
Ana müxalifət – Leyboristlər Partiyası İcmalar Palatasına 261 deputat keçirə bilib.
Şotland Milli Partiyasının 35, Liberal Demokrat Partiyasının 12 mandat əldə etdiyi bildirilir.
Növbədənkənar seçki təklifi Mühafizəkarlar Partiyasından gəlib. Əslində parlament seçkisi 2020-ci ildə keçirilməli idi.
Mühafizəkarlar Partiyasının lideri Tereza Mey hazırda baş nazir postunu tutur. 60 yaşlı Tereza Mey Oksford Universitetini bitirib. Gənc yaşlarında İngiltərə Bankında və Londonun özünüidarə orqanlarında işləyib.
1997-ci ildən İcmalar Palatasının deputatıdır. 2010-cu ildən qadın və bərabərlik məsələləri naziri postunu tutub, sonradan daxili işlər naziri olub.
Mühafizəkarlar Partiyasına 1997-ci ildə qoşulub, 2016-cı il iyulun 11-də qurumun lideri seçilib.
2016-cı il iyulun 13-də baş nazir postuna təyin edilib.
