İyunun 9-da xüsusi açıqlama yayan Ekologiya və Təbii Sərvətlər Nazirliyi bildirir ki, arıçılıq təsərrüfatlarında bal arılarının yetişdirilməsi, çoxaldılması, arıçılıq məhsullarının istehsalı və emalı üzrə fəaliyyət aktivləşib: “Bununla əlaqədar vətəndaşlar arı ailələrinin yaşadığı qutuların meşə ərazilərində yerləşdirilməsi ilə bağlı çoxsaylı müraciətlər edir. Arıçılığın ənənəvi kənd təsərrüfatı sahəsi olmasını, bu fəaliyyətin entomofil bitkilərin tozlandırılmasında əvəzsiz əhəmiyyətini nəzərə alaraq Ekologiya və Təbii Sərvətlər Nazirliyi istifadəsində olan bütün növ kateqoriyalı meşə ilə örtülü ərazilərə arı ailələrinin heç bir ödəniş olmadan, müvafiq qaydada qeydiyyatdan keçmək yolu ilə yerləşdirilməsinə icazə verir”.

Nazirlik qeyd edir ki, çiçəkləmə dövründə arıçı meşə və ekologiya idarələri ilə razılaşdıraraq müəyyən olunmuş ərazilərdə arı qutularını yerləşdirə və özü də onların yanında qala bilər (həmin şəxslərin əksəriyyəti meşəyə öz mal-qarasını da gətirmək istəyir, bu isə meşə üçün ziyanlı olduğuna görə qadağandır): “Arıların meşədə saxlanması təkcə arılar üçün deyil, həm də meşə bitkiləri üçün, otlaqlar üçün yaxşıdır və bu, ikitərəfli faydalıdır. Ekologiya və Təbii Sərvətlər Nazirliyi arı ailələrinin yerləşdirilməsində problemlə bağlı yerli meşə idarələrinə və 168 nömrəli qaynar xətt xidmətinə məlumat verilməsini xahiş edir”.