Natiq Əliyev vəfat etdi
Azərbaycanın energetika naziri Natiq Əliyev iyunun 9-u Türkiyənin İstanbul şəhərindəki “Florence Nightingale” klinikasında vəfat edib.
Natiq Əliyev iyunun 4-də ürəyində problemlər üzündən Bakıdakı Mərkəzi Neftçilər Xəstəxanasının reanimasiya şöbəsinə yerləşdirilmiş, iyunun 5-də Türkiyəyə aparılmışdı.
Novator.az bildirir ki, Natiq Əliyev 1947-ci il noyabrın 23-də Bakı şəhərində anadan olub. 1970-ci ildə Azərbaycan Neft və Kimya İnstitutunu dağ-mədən geoloqu ixtisası ilə bitirib.
“Xəzərdənizneftqazsənaye” İstehsalat Birliyinin “Azərdənizneftkəşfiyyat” trestində işləyib.
1971-ci ildən Azərbaycan Elmlər Akademiyasının Geologiya İnstitutunun aspiranturasında təhsil alıb, 1974-cü ildə geologiya-mineralogiya elmləri namizədi olub, böyük elmi işçi vəzifəsində işləyib. 2008-ci ildən iqtisad elmləri doktorudur.
1979-cu ildə “Xəzərneftqazsənaye”nin kompleks dəniz geoloji-kəşfiyyat kontorunda geologiya şöbəsinin rəisi vəzifəsinə təyin olunub.
1984-cü ildən Azərbaycan Kommunist Partiyası Mərkəzi Komitəsində təlimatçı, bölmə müdiri vəzifələrində işləyib.
1993-cü ildən 2005-ci ilə qədər Dövlət Neft Şirkətinin prezidenti olub. Nazir postuna 2005-ci ildə gətirilib.
Allah rəhmət eləsin!
