Güzəştli kredit rəqəmləri
İyunun 8-də İqtisadiyyat Nazirliyinin Sahibkarlığa Kömək Milli Fondu Göygöl rayonunun Xəqani kəndində işgüzar forum keçirib. Rəsmi məlumata görə, bildirilib ki, bu il 521 sahibkarlıq subyektinin investisiya layihəsinə 40,6 milyon manat güzəştli kredit yönəldilib. Bu kreditlərin 1500-dən çox yeni iş yerinin açılmasına imkan yaratdığı vurğulanır.
Hesabata əsasən, ümumilikdə indiyədək Gəncə-Qazax iqtisadi rayonunda fəaliyyət göstərən 6300-ə yaxın sahibkarlıq subyektinin investisiya layihəsinin maliyyələşdirilməsinə 233 milyon manatdan çox güzəştli kredit verilib.
İşgüzar forum çərçivəsində Göygöl və ətraf rayonlarda fəaliyyət göstərən sahibkarlar 709 min manat güzəştli kredit alıb. Kreditlərin əsasən heyvandarlıq, arıçılıq, üzümçülük və s. sahələrin inkişafına yönəldiləcəyi və 50-dən çox yeni iş yerinin açılmasına imkan verəcəyi qeyd olunur.
AZƏRTAC xəbər verir ki, Naxçıvan Muxtar Respublikası İqtisadiyyat Nazirliyinin nəzdində yaradılmış Sahibkarlığa Kömək Fondu 2017-ci ildə 11 layihənin maliyyələşdirilməsinə müvəkkil kredit təşkilatları vasitəsilə 335 min 900 manat vəsait ayırıb. Həmin vəsait sənaye, xidmət, kənd təsərrüfatı təyinatlı sahələrin maliyyələşdirilməsinə yönəldilib.
Kənd təsərrüfatında 8 layihənin maliyyələşdirilməsinə 180 min 900 manat ayrılıb. Bunun 125 min 500 manatı heyvandarlıq, 17 min manatı quşçuluq, 5 min manatı arıçılıq sahəsinə, 33 min 400 manatı kənd təsərrüfatı texnikasının alınması, əkin işlərinin aparılmasına sərf olunub.
Sahibkarlığa Kömək Fondunun xətti ilə bu günə qədər 1230 layihə üçün ümumilikdə 134 milyon manatdan çox güzəştli şərtlərlə kreditlər verilib.
