Sərhəd əməliyyatının hesabatı
Daxili İşlər Nazirliyinin mətbuat xidməti məlumat yayıb. Bildirilir ki, Azərbaycan və Rusiya daxili işlər nazirləri arasında əldə olunmuş razılaşma ilə mayın 29-dan iyunun 4-dək iki ölkənin sərhədyanı rayonlarının ərazisində birgə kompleks əməliyyat-axtarış və profilaktik tədbirlər keçirilib.
Əməliyyatın əsas məqsədi transmilli mütəşəkkil cinayətkar dəstələrin zərərsizləşdirilməsi, hüquqazidd əməllərin həyata keçirilməsinə yönələn maliyyə və maddi vəsaitlərin daxilolma kanallarının qarşısının alınması sahəsində birgə kompleks təşkilati-praktiki tədbirlər olub.
Dağıstan Respublikasının sərhədyanı bölgələrini, Azərbaycanın Quba, Qusar, Xaçmaz, Balakən, Zaqatala, Qax, Şəki, Oğuz və Qəbələ rayonlarını əhatə edən tədbirlər nəticəsində müxtəlif cinayətlərə görə axtarışda olan 29 şəxs, o cümlədən Rusiya Federasiyasında axtarılan 13 nəfər tutulub, itkin düşmüş hesab olunan 3 nəfərin yeri müəyyənləşdirilib, dövlətə borclu qismində axtarılan 56 nəfər saxlanıb.
Qanunsuz saxlanan 8 avtomat, 13 tapança, 66 yivli və yivsiz tüfəng, 53 ədəd əl qumbarası, 25 ədəd silah sandıqçası, 29 ədəd müxtəlif hərbi ləvazimat və sursat, 7145 ədəd müxtəlif çaplı patron götürülüb.
Əməliyyat-axtarış tədbirləri nəticəsində narkotiklərlə əlaqədar 15 fakt aşkar olunub və nəticədə 600 qram marixuana qanunsuz dövriyyədən çıxarılıb, ümumi çəkisi 10 ton 306 kiloqram olan 39 min 396 ədəd çətənə kolu məhv edilib.
Tədbirlər zamanı sərhədyanı rayonların ərazisində törədilən 16 müxtəlif cinayətin açılması da təmin edilib.
