Ərəb dünyası çat verir
İyunun 5-də Səudiyyə Ərəbistanı, Misir, Bəhreyn, Birləşmiş Ərəb Əmirlikləri, Yəmən, Liviya və Maldiv Qətəri terroru dəstəkləməkdə, bu ölkələrdə daxili sabitliyi pozmaq cəhdlərində günahlandırıb onunla diplomatik əlaqələri kəsdiklərini bəyan ediblər.
Yəməndə üsyançı şiələrə qarşı mübarizə aparan ərəb koalisiyası Qətəri “Əl-Qaidə” və İŞİD terror qruplaşmalarını, radikal “Müsəlman qardaşlar” təşkilatını dəstəkləməkdə təqsirləndirərək öz sıralarından çıxardıqlarını bildiriblər.
Qətər ərəb ölkələrinin qərarlarını əsassız saydığını bəyan edib.
Novator.az bildirir ki, mayın 21-də Səudiyyə Ərəbistanının paytaxtı Ər-Riyadda Ərəb-İslam-Amerika sammiti keçirilib. Tədbirdə iştirakçı ölkələrin qlobal təhlükəsizliyin, sabitliyin təmin edilməsində, zorakılıq, terrorizm və ekstremizmlə mübarizədə rolu və bu sahədə mövcud əməkdaşlığın daha da dərinləşdirilməsi barədə müzakirələr aparılıb. ABŞ prezidenti Donald Trampın iştirak etdiyi sammitdə İran kəskin tənqid olunub.
Sammitdən bir həftə sonra Qətərin rəsmi xəbər agentliyi ölkə əmirinin İranla münasibətləri yaxşılaşdırmağa dair çıxışını yayıb. İranı bölgədə düşmənçilik yaymaqda, terrorçuluğu dəstəkləməkdə ittiham edən bəzi ərəb dövlətləri bu açıqlamaya hiddətləniblər. Qətərin Xarici İşlər Nazirliyi bəyan edib ki, hakerlər rəsmi xəbər agentliyinin saytını sındıraraq əmirin adından İranla bağlı açıqlama yerləşdiriblər. Ancaq bu izahat qəbul olunmayıb.
