Metroda yubiley qatarı
Bakı Metropoliteni xəttə ilk yubiley qatarını buraxıb. İyunun 5-də yayılan rəsmi məlumata görə, ön və yan hissələri bənövşəyi və narıncı rəngə boyanmış qatarın tematik tərtibatı metropolitenin 50 illik yubileyinə həsr olunub.
Qatar boyunca pəncərə səviyyəsində yarım əsrlik yubiley üçün hazırlanmış xüsusi fərqləndirici loqotiplər yerləşdirilib.
Maşinist kabinəsının ön hissəsində Azərbaycan Respublikasının dövlət bayrağı əks olunub, giriş qapıları arasında pəncərəaltı orta zolaqda “Yarım əsr xidmətinizdə” devizi yer alıb.
Ön hissələri dəyişdirilən qatar müasir işıqdiodlu sistemlə təchiz olunub. Buna görə də forması fərqli olan yeni projektorların daha güclü və gur işıqlanması var.
Maşinist kabinəsində marşrut monitoru tam elektron sistemlə işləyir. Burada istiqamət göstəricisi qaçan sətirlə verilir, marşrutun say göstəricisi də elektron tabloda əks olunub.
Novator.az bildirir ki, Bakı metrosu 1967-ci il noyabrın 6-da istismara verilib. Metropoliten ümumi uzunluğu 36,63 km olan 3 xətt üzərində yerləşən 25 stansiyadan, 1 elektrik deposundan və idarə aparatının da yerləşdiyi texnoloji korpusdan ibarətdir.
Bakı metropolitenində 5 vaqondan ibarət qatarlar hərəkət edir. “Avtovağzal” və “Memar Əcəmi” stansiyalarından ibarət bənövşəyi xətt 7 vaqonluq hərəkət tərkibləri üçün nəzərdə tutulub.
