“Kanal 13” internet televiziyasının direktoru Əziz Qaraşoğluya qarşı Cinayət Məcəlləsinin 192.2-ci (qanunsuz sahibkarlıq və külli miqdarda gəlir əldə etmə) və 308.2-ci (ağır nəticələrinə səbəb olan vəzifə saxtakarlığı) maddələri ilə cinayət işi başlanıb.

İş Baş Prokurorluğun Ağır Cinayətlərə Dair İşlər üzrə İstintaq İdarəsinin icraatındadır.

İyunun 1-də həmin idarənin təqdimatına əsasən Nəsimi Rayon Məhkəməsində Əziz Qaraşoğlu barəsində 4 ay müddətinə həbs qətimkan tədbiri seçilib.

Əziz Qaraşoğlu mayın 2-də polisə müqavimətdə təqsirli bilinərək 30 sutka inzibati həbs cəzası almışdı. Onun barəsində həbs qətimkan tədbiri inzibati həbs müddətinin başa çatmaqda olduğu dövrdə seçilib.

“Kanal 13”ün direktoruna qarşı cinayət işinin açıldığı ictimaiyyətə həbs qətimkan tədbirinin seçildiyi gün – iyunun 1-də bəlli olub.

“Kanal 13” internet televiziyası əsasən 2010-cu ildən fəaliyyət göstərir. Gündəlik proqramlar hazırlayıb yayır. “Kanal 13″ün təsisçisi Anar Orucov bir neçə ildir Almaniyada yaşayır.