Komitə sədrinə yubiley təltifi
Dövlət Gömrük Komitəsinin sədri Aydın Əliyev “Şöhrət” ordeni ilə təltif edilib. Prezident İlham Əliyevin sərəncamında təltif komitə sədrinin gömrük işinin inkişafındakı xidmətləri ilə əsaslandırılıb.
Novator.az bildirir ki, Aydın Əliyevin 60 yaşı tamam olur. Aydın Əliyev 1957-ci il mayın 28-də Bakı şəhərində doğulub. 1979-cu ildə Azərbaycan Dövlət Universitetinin hüquq fakültəsini bitirib, əmək fəaliyyətinə orada müəllim vəzifəsindən başlayıb.
1980-1992-ci illərdə Aydın Əliyev Ədliyyə Nazirliyində böyük məsləhətçi, nazirin köməkçisi, kadrlar şöbəsinin rəis müavini, şöbə rəisi, Dövlət Arbitrajında arbitr, Ali Məhkəmədə şöbə rəisi vəzifələrində çalışıb.
1992-1999-cu illərdə Dövlət Gömrük Komitəsində inspektor, şöbə rəisi, aparıcı mütəxəssis, baş idarə rəisi işləyib. 1999-cu ildən komitə sədrinin birinci müavini olub, 2006-cı ilin fevral ayından sədrdir.
Dövlət başçısının digər sərəncamı ilə Azərbaycanın xüsusi xidmət orqanlarında uzunmüddətli səmərəli fəaliyyətinə görə Abbasəli Ramazan oğlu Novruzov “Şöhrət” ordeni alıb.
Mahmud Yusif oğlu Nəbiyevə isə prokurorluq və məhkəmə orqanlarında uzunmüddətli səmərəli fəaliyyətinə görə əməkdar hüquqşünas fəxri adı verilib.
