İslam Həmrəyliyi Oyunları ilə əlaqədar Bakının bəzi küçə və yollarında sarı xətlərlə nişanlanmış xüsusi zolaqlarda hərəkətə tətbiq olunmuş məhdudiyyət götürülüb. Daxili İşlər Nazirliyinin Baş Dövlət Yol Polisi İdarəsi məhdudiyyətin mayın 23-ü gündüz saat 12-dən ləğv olunduğunu açıqlayıb.

Hesabata görə, məhdudiyyətin tətbiq olunduğu mayın 5-dən bəri sarı xətlərlə nişanlanmış zolaqlara daxil olaraq qayda pozan 1319 nəfər inzibati məsuliyyətə cəlb edilib.

IV İslam Həmrəyliyi Oyunları mayın 22-si Bakı Olimpiya Stadionunda təntənəli mərasimlə başa çatıb. İki həftə davam edən yarışlara 54 ölkəni təmsil edən 3 mindən çox idmançı, 2000-dək komanda rəsmisi və texniki nümayəndə qatılıb. İdmanın 24 növü üzrə keçirilən yarışlarda atletlər 269 dəst medal uğrunda mübarizə aparıblar.