Şirvan Milli Parkında yanğın olub
Mayın 22-də Şirvan Milli Parkının Neftçala rayonunun Müşfiqabad qəsəbəsi ilə sərhədində yanğın baş verib.
Ərazidə əsən güclü külək nəticəsində yanğın qısa müddətdə Şirvan Milli Parkının ərazisinə keçib.
Yanğının söndürülməsi üçün əraziyə dərhal Ekologiya və Təbii Sərvətlər Nazirliyinin və Fövqəladə Hallar Nazirliyinin yerli qurumunun əməkdaşları cəlb olunub və qısa müddət ərzində yanğın tam lokallaşdırılaraq söndürülüb.
Yanğın nəticəsində Milli Parkın təxminən 3 hektar ərazisində quru ot örtüyünə ziyan dəyib.
Ekologiya və Təbii Sərvətlər Nazirliyinin yaydığı məlumatda bildirilir ki, yanğının səbəbləri və dəymiş ziyanın müəyyən olunması istiqamətində iş aparılır.
