Ekoloqların peşə bayramı: 30 hektar ərazidə iməcilik keçirilib
Mayın 23-ü Ekologiya və Təbii Sərvətlər Nazirliyi işçilərinin peşə bayramıdır.
Bu münasibətlə nazirliyin kollektivi Fəxri xiyabanda mərhum prezident Heydər Əliyevin xatirəsini anıblar, sonra Şəhidlər xiyabanında şəhidlərin məzarlarını ziyarət ediblər.
Peşə bayramı ilə əlaqədar tədbirlər Zığ-Heydər Əliyev Beynəlxalq Hava Limanı magistral avtomobil yolunun 22-ci kilometrliyinin ətrafında Ekologiya və Təbii Sərvətlər Nazirliyi tərəfindən salınmış yaşıllıq zonasında davam etdirilib.
Nazir Hüseyn Bağırov burada çıxış edərək görülən işlərdən və perspektiv planlardan danışıb.
Tədbirin davamı olaraq 30 hektar ərazidə iməcilik keçirilib. İməcilikdə nazir, nazirliyin əməkdaşları, ekoloji qeyri-hökumət təşkilatları və ictimaiyyətin nümayəndələri iştirak ediblər. Ərazidə abadlıq işləri aparılaraq yaşıllıqlara aqrotexniki qulluq göstərilib, ağacların dibi yumşaldılıb, sahə alaq otlarından təmizlənib.
Ekologiya və Təbii Sərvətlər Nazirliyi işçilərinin peşə bayramı prezident İlham Əliyevin 2007-ci il mayın 16-da imzaladığı sərəncama əsasən təsis olunub.
