Nazirlərin görüşü
Gürcüstana rəsmi səfər edən Azərbaycanın müdafiə naziri Zakir Həsənov mayın 22-də həmkarı Levan İzoria ilə görüşüb. Mod.gov.az-ın məlumatına görə, görüşdə iki ölkə arasında hərbi, hərbi təhsil, hərbi tibb sahələrində əməkdaşlığın perspektivləri və qarşılıqlı maraq doğuran digər məsələlər barədə ətraflı fikir mübadiləsi aparılıb.
Regiondakı hərbi-siyasi vəziyyətə toxunan tərəflər bölgədə sabitliyin təmin olunmasının əhəmiyyətini vurğulayaraq bu formatda münasibətlərin ölkələrin təhlükəsizliyinə və inkişafına töhfə verəcəyini xüsusi qeyd ediblər.
Azərbaycan nümayəndə heyəti Tbilisi şəhərindəki Qəhrəmanlar Meydanında Gürcüstanın ərazi bütövlüyü və müstəqilliyi uğrunda həlak olmuş vətəndaşların xatirəsinə ucaldılmış abidə önünə əklil qoyub və onların xatirəsini yad edib.
