Rusiya qərar verdi, qalır nöqtə qoymaq
Rusiya Ali Məhkəməsi Ümumrusiya Azərbaycan Konqresinin (ÜAK) qeydiyyatının ləğvinə dair iddia üzrə prosesi yekunlaşdırıb. Mayın 15-də keçirilən iclasda iddiaçı Ədliyyə Nazirliyinin istəyi təmin olunub, ÜAK-nin qeydiyyatının ləğvinə qərar verilib.
Ədliyyə Nazirliyi 2001-ci ildən fəaliyyət göstərən ÜAK-də nəzarət-təftiş tədbirləri zamanı Rusiya qanunvericiliyinin və qurumun nizamnaməsinin pozuntularının aşkarlandığını, nöqsanların aradan qaldırılması tövsiyələrindən nəticə çıxarılmadığını bəyan etmişdi.
Ali Məhkəmənin qərarı hələ qanuni qüvvəyə minməyib. ÜAK 15 may qərarından bir ay ərzində apellyasiya şikayəti verə bilər. Qurumun prezidenti Fazil Qurbanov bu hüquqdan yararlanacaqlarını bildirib.
