İlkin Rüstəmzadə müalicə müəssisəsinə köçürülüb
NİDA Vətəndaş Hərəkatının həbsdə olan üzvü İlkin Rüstəmzadə Penitensiar Xidmətin mərkəzi müalicə müəssisəsinə köçürülüb. Bunu Azadliq.org-a məhbus fəalın bacısı Türkan Rüstəmzadə deyib. O, mayın 15-də qardaşı ilə telefonla danışdığını qeyd edib.
Türkan Rüstəmzadə qardaşının alacağı müalicələr barədə bilgisi olmadığını vurğulayıb.
İlkin Rüstəmzadə 2013-cü ilin yazında daha 7 “Nida”çı gənclə birgə həbs olunub. Gənclər əsasən kütləvi iğtişaşları təşkil etmə cəhdində təqsirli biliniblər. İlkin Rüstəmzadədən başqa bütün NİDA-çılar dövlət başçısının imzaladığı əfv sərəncamları ilə azadlığa buraxılıblar.
Fəalın saxlandığı 13 saylı Cəzaçəkmə Müəssisəsinin həkimi məhbusun Penitensiar Xidmətin müalicə müəssisəsinə köçürülməsi və zəruri müayinələrdən keçməsi üçün təqdimat vermiş, amma ötən həftə Ədliyyə Nazirliyinin Penitensiar Xidməti bunu məqsədəuyğun saymamışdı.
İlkin Rüstəmzadənin mədə xorası və nevrozdan əziyyət çəkdiyi bildirilir.
