Mayın 16-da Ermənistanın Xüsusi İstintaq Xidməti yeni açıqlama yayıb. Novator.az-ın məlumatına görə, açıqlamada deyilir ki, Azərbaycanda yetişdirilmiş almaların ölkəyə qanunsuz gətirilməsi və Dövlət Gəlirləri Komitəsinin əməkdaşlarının rüşvət alması ilə bağlı cinayət işləri bir icraatda birləşdirilib.

İstintaq müəyyən edib ki, bəzi sahibkarlar qanunsuz yolla meyvə-tərəvəz idxalı ilə məşğul olub, bu işdə onlara Dövlət Gəlirləri Komitəsinin əməkdaşları yardım ediblər. Həmin əməllərə görə 4 mülki şəxsə və Dövlət Gəlirləri Komitəsinin 4 əməkdaşına ittiham irəli sürülüb. Sahibkarlar vergidən yayınmada və qanunsuz sahibkarlıqda, məmurlar rüşvət almaqda təqsirli bilinirlər. Dövlət Gəlirləri Komitəsinin 2 məmuru haqqında həbs qətimkan tədbiri seçilib.

Qanunsuz sahibkarlıq və vergidən yayınma üzrə Ermənistan dövlətinə 16,5 milyon dollara yaxın ziyan vurulduğu bildirilir.

Azərbaycanda yetişdirilmiş almaların Ermənistanda satılması ötən ay üzə çıxıb. Ərzaq Məhsullarının Təhlükəsizliyi Dövlət Xidməti aprelin 23-dən ölkənin bazarlarında geniş yoxlamalar aparıb, sərhəd nəzarətindən keçməmiş Azərbaycan məhsulları bazarlardan yığışdırılıb və onlar məhv edilib.