Bakıda qələbə bayramı
Mayın 9-u Bakıda İkinci Dünya müharibəsində (1939-1945) qələbənin 72-ci ildönümü münasibətilə mərasim keçirilib. Tank qoşunları general-mayoru, iki dəfə Sovet İttifaqı Qəhrəmanı Həzi Aslanovun abidəsi önündə keçirilən mərasimə prezident, Silahlı Qüvvələrin ali baş komandanı İlham Əliyev, birinci vitse-prezident Mehriban Əliyeva, baş nazir Artur Rasizadə, Milli Məclisin sədri Oqtay Əsədov, Prezident Administrasiyasının rəhbəri Ramiz Mehdiyev və digər rəsmi şəxslər qatılıblar.
İlham Əliyev müharibə veteranları və Həzi Aslanovun ailə üzvləri ilə görüşərək onları təbrik edib.
Xəbəri AZƏRTAC yayıb.
Novator.az xatırladır ki, İkinci Dünya müharibəsində Sovet İttifaqının və onun müttəfiqlərinin Hitler Almaniyası üzərində qələbəsi 1945-ci il mayın 9-da rəsmiləşib.
1941-1945-ci illərdə SSRİ-nin alman işğalına qarşı apardığı müharibədə Azərbaycandan 640 mindən çox adam döyüşüb. Onların təxminən yarısı həlak olub, 130-dan çox azərbaycanlı döyüşçü Sovet İttifaqı Qəhrəmanı adına layiq görülüb, 170 mindən çox əsgər və zabit müxtəlif orden və medallarla təltif edilib.
