Torpaq laboratoriyaları fermerlərə xidmət göstərib
Əmlak Məsələləri Dövlət Komitəsinin mobil torpaq laboratoriyaları Sabirabadda fermerlərə xidmət göstərib. Rəsmi məlumata görə, mayın 8-i mobil laboratoriyalarla rayonun əkin sahələrində, o cümlədən pambıq tarlalarında torpaqların münbitlik, keyfiyyət göstəriciləri müəyyən edilib, əkin sahələrinin yararlılıq dərəcələri, torpağın qida rasionu müəyyənləşdirilib, torpaqların morfoloji xüsusiyyətləri, yəni nəmliyi, ümumi humusu, karbonatlığı, quru qalığı, udulmuş əsasları, temperaturu və s. təyin olunub.
Aparılan təhlillər əsasında torpağa hansı mineral və ya üzvi gübrədən nə qədər verilməsi müəyyənləşib. Kəndlilər torpaq analizlərinin nəticələrinə əsasən yaxşı məhsul almaq üçün aqrokimyəvi tədbirlər barədə məlumat alıblar.
Bu il Ağcabədi, Şabran, İmişli, Qəbələ, Kürdəmir, Şəmkir, Samux, Zərdab, Masallı və digər bölgələrin 657 min hektardan çox ərazisində irimiqyaslı çöl-torpaq tədqiqatı işləri aparılacaq. Tədqiqat və laboratoriya analizlərinin nəticələrinə əsaslanaraq bu rayonların torpaq, şorlaşma və eroziya xəritələri hazırlanacaq. Eyni zamanda həmin ərazilərin torpaqlarının bonitirovkası və iqtisadi qiymətləndirilməsi işləri aparılacaq.
Bununla yanaşı cari ildə 810 min hektara yaxın ərazidə, yay və qış otlaqlarında irimiqyaslı çöl geobotaniki tədqiqat işləri tam yerinə yetiriləcək.
2020-ci ilədək Azərbaycanda torpaqların keyfiyyət göstəricilərinə görə uçotunun aparılması nəzərdə tutulub.
