Bu ilin aprel ayınadək Respublika Talassemiya Mərkəzində 2 min 959 xəstə dispanser qeydiyyatına salınıb. Səhiyyə Nazirliyi bildirir ki, mərkəzin gündüz stasionarında dispanser qeydiyyatında olan 976 xəstəyə müntəzəm eritrosit kütləsi köçürülür.

İlin ilk rübü ərzində mərkəzə 6 min 273 müraciət daxil olub, 72 nəfər dispanser qeydiyyatına götürülüb. Həmin dövrdə hematologiya şöbəsində 105 xəstə stasionar müalicə alıb.

Bu il sümük iliyi transplantasiya şöbəsində 9 xəstə üzərində sümük iliyi transplantasiyası əməliyyatı aparılıb. Şöbənin fəaliyyətə başladığı 2014-cü ildən bu yana isə 51 xəstə eyni məqsədlə əməliyyat olunub.

Nazirlik bildirir ki, indiyədək talassemiya daşıyıcılarının aşkarlanması üçün nikaha daxil olmaq istəyən 258 min 521 nəfər müayinədən keçib, onlardan 11 min 215 nəfərində daşıyıcılıq aşkarlanıb. 97 cütlüyün hər ikisində daşıyıcılıq aşkar edilib, 54 cütlük prenetal diaqnostika olunması üçün qeydə alınıb.