AXCP fəalına 3 il həbs cəzası verilib
Azərbaycan Xalq Cəbhəsi Partiyasının (AXCP) fəalı Elnur Fərəcov Neftçala Rayon Məhkəməsinin hökmü ilə 3 il azadlıqdan məhrum edilib.
Vəkil Nemət Kərimli “Azadlıq” radiosuna deyib ki, qərar mayın 3-də çıxarılıb.
Qərardan şikayət veriləcək.
Elnur Fərəcov Cinayət Məcəlləsinin 234.2-ci (narkotik vasitələrin, psixotrop maddələrin satış məqsədilə qanunsuz əldə edilməsi, saxlanması, hazırlanması və göndərilməsi) maddəsi ilə təqsirli bilinib.
Elnur Fərəcova cinayət işi 2016-cı ilin dekabrında açılıb. Vəkilin sözlərinə görə, Elnur təxribatla üzləşib: “Bir nəfər Elnur Fərəcovla tanış olub, ona rayonda biznes qurmaq istədiyini deyib. O, Elnura onu işlə təmin etməyə söz verib. Elnur razılaşıb və birlikdə çayxanaya gediblər. Bu zaman polis çayxananı mühasirəyə alıb və onun tanışının cibindən narkotik götürüblər. O isə narkotik vasitəni Elnur Fərəcovdan aldığını deyib. Bu şəxsi “istintaqa yardım” adı ilə məsuliyyətdən azad ediblər”.
Elnur Fərəcov barəsində isə həbs qətimkan tədbiri seçilib.
Vəkil Nemət Kərimli deyir ki, Elnur Fərəcovun məsələsi siyasi işdir və təqsirləndirilən şəxsin müxalif fəaliyyəti, etiraz aksiyalarında iştirakı ilə bağlıdır.
Hazırda AXCP-nin 10-dan çox üzvü həbsdədir. Partiya onların hamısına böhtan atıldığını, siyasi sifarişlə tutulduqlarını bəyan edir. Ancaq hakimiyyət rəsmiləri ölkədə siyasi məhbusların olduğu fikrini qəbul etmirlər. Onlar deyirlər ki, siyasi məhbus sayılan şəxslər törətdikləri əməllərə görə məsuliyyətə cəlb olunublar.
