Münbit torpağı ən çox hansı bölgələrdə oğurlayırlar?
Əmlak Məsələləri Dövlət Komitəsi torpaqlardan istifadəyə nəzarətlə bağlı yeni məlumat yayıb. Qeyd olunur ki, son monitorinqlər kənd təsərrüfatına yararlı torpaqların üst münbit qatının müxtəlif ərazilərə daşınması hallarını əhatə edib. Qobustanda keçirilən monitorinqlər zamanı torpaqların üst münbit qatının götürülərək ağır tonnajlı avtomobillərlə Bakıya və digər böyük şəhərlərə aparılması aşkar edilib. Bununla da bir hektardan çox kənd təsərrüfatı təyinatlı torpaq sahələri yarasız hala salınıb. Komitənin torpaq müfəttişləri və hüquq mühafizə orqanlarının birgə keçirdiyi reydlərdə belə hallara yol verən şəxslərə protokol yazılıb, müvafiq qaydada cərimə tətbiq olunub.
Əmlak Məsələləri Dövlət Komitəsi qeyd edir ki, belə qanunsuzluqların qarşısının alınması üçün İnzibati Xətalar Məcəlləsində cərimələr, Cinayət Məcəlləsində isə azadlıqdan məhrumetmə cəzası müəyyən olunub. Torpaqların münbit qatını korlayan fiziki şəxsləri 600 manatdan 1000 manatadək, vəzifəli şəxsləri 2000 manatdan 3000 manatadək, hüquqi şəxsləri isə 6000 manatdan 8000 manatadək cərimə gözləyir.
Novator.az bildirir ki, rəsmi hesabata görə, torpaqların münbit qatının daşınması hallarına Şamaxı, Qobustan, İsmayıllı, Xızı rayonlarının ərazisində, eləcə də cənub bölgəsində daha çox rast gəlinib.
Ümumilikdə bu istiqamətdə aparılan reydlər nəticəsində 50-dən artıq halı aşkar edilərək qarşısı alınıb.
Torpaqların üst münbit qatının müxtəlif ərazilərə daşınması bir sıra mənfi fəsadlara gətirir. Bu hal torpaqların yüz illər ərzində formalaşan üst münbit qatının korlanmasına, torpaq kütləsi götürülməklə yararsız hala düşməsinə, ona bitişik torpaq sahələrinin eroziyaya uğramasına, maili ərazilərdə sürüşmə prosesinin yaranmasına səbəb olur.
