Dövlət Sərhəd Xidməti 15 illik rəqəmləri açıqlayıb
Dövlət Sərhəd Xidməti fəaliyyətinə dair rəqəmlər açıqlayıb. Novator.az mayın 4-də yayılan rəsmi məlumata istinadla bildirir ki, 2002-ci ildə yaradılan qurumun indiyə qədər 14 hərbi hissə kompleksi istifadəyə verilib, 658 xidməti binası inşa edilib. 15 ildə Dövlət Sərhəd Xidməti 130 min 191 nəfər sərhəd və rejim pozucusu, 24 min 259 nəfər axtarışda olan şəxsi saxlayıb.
Dövlət Sərhəd Xidmətinin fəaliyyət illərində dəyəri təxminən 106 milyon manat olan qaçaqmalın, 4 ton narkotik vasitənin dövlət sərhədindən keçirilməsinin qarşısı alınıb, 385 ton narkotik mənşəli bitki kolu aşkar olunub, xarici xüsusi xidmət orqanları ilə əlaqədə şübhəli bilinən 90 nəfər müəyyən edilib, terrorçuluğa qarşı mübarizə çərçivəsində 81 şəxs saxlanıb, qanunsuz miqrasiya, qaçaqmalçılıq, o cümlədən narkotik qaçaqmalçılığı ilə məşğul olan 123 mütəşəkkil cinayətkar dəstə zərərsizləşdirilib.
Dövlət Sərhəd Xidməti 31 iyul 2002-ci ildə Milli Təhlükəsizlik Nazirliyinin Sərhəd Qoşunları İdarəsinin bazasında yaradılıb.
