Maliyyə Nazirliyi 2017-ci ilin birinci rübündə dövlət büdcəsinin necə icra olunduğunu açıqlayıb. Novator.az bildirir ki, aprelin 28-də yayılan hesabata görə, ilin birinci rübündə dövlət büdcəsinin mədaxili 3 milyard 591,5 milyon manat, xərcləri 3 milyard 912,7 milyon manat olub, 321,2 milyon manat məbləğində büdcə kəsiri (defisit) yaranıb.
Gəlirlərin proqnozdan 3,4 faiz çox olduğu bildirilir.
Vergilər Nazirliyindən dövlət büdcəsinə 1 milyard 420,8 milyon manat, Dövlət Gömrük Komitəsindən 571 milyon manat daxil olub.
Dövlət büdcəsindən maliyyələşdirilən təşkilatların ödənişli xidmətlərindən 62,6 milyon manat, sair daxilolmalar üzrə 12,1 milyon manat vəsait gəlib.
Dövlət Neft Fondundan büdcəyə 1 milyard 525 milyon manat vəsait transfert edilib.
2017-ci ilin ilk üç ayında dövlət büdcəsinin xərcləri proqnoza nisbətən 95,5 faiz icra olunub.
Dövlət büdcəsi xərclərinin 41,8 faizi sosial yönümlü xərclərin (əməyin ödənişi fondu, təqaüd və sosial müavinətlər, dərman və ərzaq xərcləri) maliyyələşdirilməsinə gedib.