Aprelin 28-i Moskvada Rusiya, Azərbaycan, Ermənistan xarici işlər nazirlərinin görüşü keçirilib. Novator.az-ın məlumatına görə, Rusiyanın xarici işlər naziri Sergey Lavrov həmkarları Elmar Məmmədyarov və Edvard Nalbandyanla əvvəlcə ayrı-ayrılıqda bir araya gəlib. Sonra üçtərəfli formatda danışıq aparılıb.

Görüşlərdə Dağlıq Qarabağ münaqişəsinin dinc yolla həlli məsələləri müzakirə olunub.

Üçtərəfli danışıqların bir hissəsinə ATƏT-in Minsk qrupunun həmsədrləri İqor Popov (Rusiya), Stefan Viskonti (Fransa), Riçard Hoqland (ABŞ), ATƏT-in fəaliyyətdə olan sədrinin şəxsi nümayəndəsi Anjey Kasprşik də qatılıblar.

1988-ci ildə Azərbaycana hərbi təcavüzə başlayan Ermənistan Dağlıq Qarabağ bölgəsini və daha 7 rayonu işğal edib. 1994-cü ildə elan olunan atəşkəsdən bəri ATƏT-in Minsk qrupunun vasitəçiliyi ilə aparılan sülh danışıqları heç bir nəticə vermir. Hazırda danışıqlar Madrid prinsipləri əsasında aparılır. Minsk qrupu həmsədrlərinin – Rusiya, Fransa və ABŞ-ın 2007-ci ildə Madriddə irəli sürdüyü prinsiplər Dağlıq Qarabağ ətrafında olan rayonların mərhələlərlə Azərbaycanın nəzarətinə qaytarılması şərti ilə bölgənin yekun statusunun müəyyənləşməsini nəzərdə tutur.