Ermənistan “Osa” zenit raket kompleksindən istifadə edib
Ermənistan cəbhə xəttində vəziyyəti yenidən gərginləşdirmək məqsədilə təxribat xarakterli fəaliyyətini davam etdirir.
Müdafiə Nazirliyi mətbuat xidmətinin bununla bağlı yaydığı məlumatda deyilir ki, aprelin 27-də axşam saatlarında Ermənistan hava hücumundan müdafiə bölmələri cəbhənin Xocavənd-Füzuli istiqamətində “OSA” zenit raket kompleksindən raket buraxıb. İdarəolunan raket heç bir hədəfə dəymədən nəzarətimizdə olan ərazidə boş sahəyə düşüb.
Əraziyə baxış keçirilib, 9M33M2 tipli raketin başlıq hissəsi və digər qalıqları tapılaraq götürülüb.
İlkin araşdırma Ermənistan silahlı qüvvələrinin silahlanmasında olan raketlərin köhnə və istismara yararsız olduğunu göstərib.
