Virtual məkanda erməni təbliğatına qarşı mübarizədə fəal olan azərbaycanlıların nəzərinə: ermənilər Facebook və Twitter şəbəkəsində #killzibil adlı bir həştəq yaradıblar.

“Kill” ingilis dilində öldür, məhv et mənasını verir. İngiliscədən və Azərbaycan türkcəsindən istifadə etməklə belə bir həştəqin yaradılmasında məqsəd aydındır. Bu məqsədi həştəqi yaradanların Ermənistanda “Həyətə çıx” devizi ilə keçirəcəyi iməclikdə iştirakçılara mükafat kimi vəd etdikləri parça çantalar da aydın göstərir. Çanta üzərində türk totemi – qurd başı həkk olunub.

İməclik aprelin 29-da keçiriləcək. İməcliyin əsas təşkilatçısı Ayk Zalibekyan adlı bir memardır. İməclik təşkilatçıları hazırda Facebook və Twitter şəbəkəsində “killzibil” həştəqindən geniş istifadə etməkdədirlər.

Novator.az bu xəbəri oxucuların diqqətinə çatdıraraq qeyd edir ki, Azərbaycanın sosial şəbəkə fəallarının həmin həştəqdən yararlanmaqla zibilin əsl ünvanını təşkilatçılara və iştirakçılara göstərmək imkanı var.