Çexiya parlamenti “erməni soyqırımı”nı tanıdı
Çexiya parlamentinin Deputatlar Palatası qondarma erməni soyqırımını tanıyan qətnamə qəbul edib. Novator.az-ın məlumatına görə, aprelin 25-də səsverməyə çıxarılan sənədi 104 deputat dəstəkləyib. Deputatlar Palatası 200 nəfərlikdir.
Sosial Demokrat Partiyasından deputat Robin Benişin təqdim etdiyi sənəddə “erməni soyqırımı” bəşəriyyətə qarşı cinayət adlandırılır.
Saxta soyqırımı iddialarına görə, 1915-ci il aprelin 24-dən başlayaraq 1923-cü ilə kimi Türkiyədə 1 milyon 500 min nəfər erməni öldürülüb. Bu iddiaları indiyədək onlarca ölkə (Fransa, İtaliya, İsveçrə, Avstriya, Niderland, Belçika, Yunanıstan, Kipr, Polşa, Litva, Rusiya, Kanada, Uruqvay, Braziliya, Argentina, Çili, Vatikan, Danimarka və s.), Avropa Parlamenti rəsmən tanıyıb.
