Xaricdə dini təhsil almış Azərbaycan vətəndaşlarına mərasim aparmaq icazəsi verilir
Aprelin 24-də Milli Məclisin ictimai birliklər və dini qurumlar komitəsinin iclası keçirilib. AZƏRTAC xəbər verir ki, iclasda “Dini etiqad azadlığı haqqında” qanuna dəyişiklik layihəsi müzakirə edilib. Təklif olunan yeniliyə əsasən, Qafqaz Müsəlmanları İdarəsi xaricdə dini təhsil almış Azərbaycan vətəndaşlarına islam dininə aid ayin və mərasimlər aparmaq icazəsi verə bilər. Bu icazə Dini Qurumlarla İş üzrə Dövlət Komitəsi ilə razılaşdırılmalıdır.
Dini mərkəzin dəvət etdiyi din xadimləri istisna olmaqla əcnəbilər və vətəndaşlığı olmayan şəxslərin dini təbliğat aparması qadağandır. Vətəndaşların təhsil almaq üçün xarici ölkələrin dini tədris müəssisələrinə göndərilməsini, dini tədris müəssisələri tələbələrinin və müəllimlərinin, habelə din xadimlərinin və mütəxəssislərinin mübadiləsini müvafiq icra hakimiyyəti orqanı ilə razılaşdırmaqla dini mərkəz həyata keçirir.
