Daxili İşlər Nazirliyi ekoloji pozuntularla bağlı hesabat açıqlayıb. Rəsmi məlumata görə, ilin ilk rübündə nazirliyin Baş İctimai Təhlükəsizlik İdarəsinin Ekologiya və Təbii Sərvətlər Nazirliyi ilə birgə apardığı yoxlamalar nəticəsində 248 nəfər inzibati məsuliyyətə cəlb olunub.

Yanvar-mart aylarında şəhər, rayon polis orqanlarının həyata keçirdiyi tədbirlərlə İnzibati Xətalar Məcəlləsinin 244-cü (torpaqların zibillənməsi və korlanması), 266-cı (istehsalat və məişət tullantıları haqqında qanunvericiliyin pozulması) və 271-ci (sənaye və məişət tullantılarının qalaqlanması və yandırılması zamanı ətraf mühitin mühafizə tələblərinə əməl edilməməsi) maddələrinin tələblərini pozanlara ümumilikdə 28 min 350 manat cərimə tətbiq edilib.

Təkcə mart ayında paytaxtın Sabunçu, Suraxanı, Binəqədi, Xəzər, eyni zamanda Abşeron rayonları ərazilərində İnzibati Xətalar Məcəlləsinin qeyd edilən maddələrinin tələblərini pozan 12 fiziki, hüquqi və vəzifəli şəxs müəyyən edilərək inzibati məsuliyyətə cəlb olunub, onlara 17 min 450 manat cərimə tətbiq edilib.