Uşağa hansı adı qoymaq olar? Hökumət suala tam aydınlıq gətirdi
Tacikistanda yeni doğulan uşaqlara hansı adları qoymaq olar?
2016-cı ilin martında ad-soyadlarla bağlı qanuna edilən düzəlişlərdən sonra bu sualın cavabı müəyyən qədər naməlum qalmışdı. Düzəlişlər uşağa tacik milli mədəniyyətinə yad olan, təhqiramiz səslənən, şərəf və ləyaqəti alçaldan, həmçinin insanları siniflərə bölən adların qoyulmasını, eyni zamanda adlara “molla”, “xəlifə”, “xoca”, “şeyx”, “vali”, “əmir”, “sufi” kimi əlavələrin edilməsini yasaqlayır.
Novator.az xəbər verir ki, düzəlişlərdən sonra “uşağa hansı adı qoymaq olar” sualına tam aydınlıq gətirmək üçün Tacikistanda milli adların reyestri aparılıb. Dövlətin icazə verdiyi adlar reyestrdə toplanıb. Bu işi Mədəniyyət Nazirliyi həyata keçirib.
“Milli adların reyestri”nə 3 mindən çox ad daxil edilib. Nəşrdə adların rus və ingilis dillərində yazılış forması da göstərilib.
Tacikistan Mədəniyyət Nazirliyi bəyan edib ki, adların reyestri milli-mədəni, tarixi dəyərlərin qorunub saxlanmasında və inkişaf etdirilməsində əhəmiyyətli rol oynayacaq.
