Hər 100 doğulan qıza 112 oğlan düşür
Dövlət Statistika Komitəsi demoqrafik vəziyyətlə bağlı hesabat yayıb. Novator.az bildirir ki, hesabata görə, ilin əvvəlindən ölkə əhalisinin sayı 13686 nəfər və yaxud 0,1 faiz artaraq 2017-ci il mart ayının 1-nə 9 milyon 823 min 667 nəfərə çatıb.
Əhalinin 49,9 faizi kişilər, 50,1 faizi qadınlardır. Hazırda hər 1000 kişiyə orta hesabla 1006 qadın düşür.
Ədliyyə Nazirliyinin rayon (şəhər) qeydiyyat şöbələrində cari ilin yanvar-fevral ayları ərzində 24648, yaxud hər gün orta hesabla 418 doğulmuş körpə qeydə alıb. Yeni doğulan körpələr arasında qızların xüsusi çəkisi 47,3 faiz olub (hər 100 doğulan qıza 112 oğlan düşür, bioloji norma isə 105-107-dir).
2017-ci ilin yanvar-fevral aylarında ölkədə 11070 ölüm halı qeydə alınıb.
İlk iki ayında 8476 nikah və 2422 boşanma rəsmiləşib.
2017-ci ilin yanvar-fevral ayları ərzində Daxili İşlər Nazirliyi və Dövlət Miqrasiya Xidmətinin müvafiq qurumları daimi yaşamaq üçün Azərbaycana 306 nəfər gələn və 198 nəfər ölkədən gedən qeydə alıb, miqrasiya saldosu müsbət 108 nəfər təşkil edib.
