Nazirliyə müraciətlər niyə azalıb?
Əmək və Əhalinin Sosial Müdafiəsi Nazirliyi bildirir ki, bu ilin birinci rübündə vətəndaşların nazirliyə şikayət məzmunlu müraciətlərinin sayı ötən ilin müvafiq dövrü ilə müqayisədə 5,2 dəfə azalaraq 477-dən 91-ə enib.
Rəsmi hesabata görə, müraciətlərdə azalma dinamikası xüsusən sosial təminat və əlillik təyinatı məsələlərinə aid olub. Şikayət xarakterli müraciətlərin sayı sosial təminat məsələləri ilə bağlı 6,4 dəfə (412-dən 64-ə enib), əlillik məsələləri ilə əlaqədar 15 dəfə (60-dan 4-ə enib) azalıb.
Şikayətlərin azalması elektron xidmətlərin geniş istifadəsi ilə əlaqələndirilir.
Qeyd olunur ki, cari ilin yanvar-mart aylarında Əmək və Əhalinin Sosial Müdafiəsi Nazirliyinə daxil olan müraciətlərin sayı ötən ilin müvafiq dövrünə nisbətən 32 faiz azalaraq 13702-yə enib. O cümlədən sosial təminat məsələlərinə dair müraciətlərin sayında 41 faiz, tibbi-sosial ekspertiza və reabilitasiya məsələlərinə dair müraciətlərin sayında 13 faiz, məşğulluq məsələlərinə dair müraciətlərin sayında 15 faiz, əmək qanunvericiliyinə dair müraciətlərin sayında 36 faiz azalma qeydə alınıb.
