Dövlət Dəniz Administrasiyasında Fövqəladə Hallar Nazirliyi, Müdafiə Nazirliyi, Dövlət Sərhəd Xidməti, Dövlət Neft Şirkəti və Azərbaycan Xəzər Dəniz Gəmiçiliyi ilə birgə yaradılmış qərargah yeni məlumatlar yayıb. Qeyd olunur ki, aprelin 6-sı Xəzər dənizində meyiti tapılmış şəxsin “Azneft” İstehsalat Birliyinin Nəriman Nərimanov adına Neft-Qaz Çıxarma İdarəsinin əmtəə operatoru vəzifəsində çalışmış 1971-ci il təvəllüdlü Zülfüqarov Azay Hacıbala oğlu olduğu müəyyən edilib.

Ötən il dekabrın 15-də güclü külək Nəriman Nərimanov adına Neft-Qaz Çıxarma İdarəsinin Xəzər dənizindəki bir estakadasını dənizə uçurmuş, 10 neftçi batmış, bu il aprelin 6-dək 7 şəxsin meyiti tapılmışdı.

Novator.az bildirir ki, aprelin 9-da qərargahın yaydığı son məlumata əsasən, axtarış əməliyyatları nəticəsində dənizdə daha bir naməlum kişi meyiti aşkarlanıb. Tapılan şəxsin estakadanın uçması zamanı itkin düşən neftçi olub-olmadığı müəyyənləşdirilir.