Rusiya: əhalinin 75%-i internet istifadəçisidir
Rusiyada internet istifadəçiləri əhalinin 75%-ni əhatə edir. Novator.az-ın məlumatına görə, Ümumrusiya İctimai Rəyi Öyrənmə Mərkəzi belə hesabat yayıb.
Təşkilat bildirir ki, 2011-ci ildən Rusiyada internet istifadəçilərinin sayı 1,5 dəfə artıb. 2011-ci ildə ölkə əhalisinin 51%-i internet istifadəçisi idi.
Təşkilatın açıqlamasında deyilir ki, 18-24 yaş arasında olan gənclərin 90%-i hər gün internetə daxil olur.
Araşdırmaya görə, rusiyalılar internetdən əsasən yaxınları və dostları ilə ünsiyyət qurmaq, xəbər oxumaq və əyləncə məqsədilə istifadə edirlər.
İnternetlə bank əməliyyatları aparanlar da kifayət qədərdir. İstifadəçilərin yarıya qədəri belə xidmətlərdən istifadə edir.
Araşdırmaya görə, Rusiyada hər üç istifadəçidən biri internetə daxil olarkən çətinlik çəkir, çünki lazımi vərdişləri yaxşı mənimsəməyib. Bunlar əsasən yaşlılardır.
