“Çıxış”da kimlər var?
Ermənistanda aprelin 2-də seçilmiş yeni parlamentə 4 siyasi qüvvə düşüb. Onlardan üçü – hakim Respublika Partiyası, Çiçəklənən Ermənistan Partiyası, Daşnaksütun Partiyası indiki parlamentdə də təmsil olunurlar.
“Çıxış” bloku isə parlamentdə yeni qüvvədir. Novator.az qeyd edir ki, bu bloku üç müxalif partiya qurub – İşıqlı Ermənistan Partiyası (lideri Edmon Marukyan), Vətəndaş Sazişi Partiyası (lideri Nikol Paşinyan), Respublika Partiyası (lideri Aram Sərkisyan).
İlkin hesablamalara görə, yeni parlamentə Ermənistan Respublika Partiyasından 58, Çiçəklənən Ermənistan Partiyasından 31, “Çıxış” blokundan 9, Daşnaksütun Partiyasından 7 nəfər keçib.
“Çıxış” blokundan 2 aprel seçkisində Nikol Paşinyan, Gevorq Qorqisyan, Mane Tandilyan, Ararat Mirzoyan, Aram Sərkisyan, Edmon Marukyan, Sasun Mikaelyan, Artak Zeynalyan və Lena Nazaryan mandat alıblar.
Ermənistan Respublika Partiyası mandatların yarıdan çoxuna sahib olduğu üçün hökuməti qurmaq imkanı əldə edib. Bu partiyanın lideri prezident Serj Sərkisyandır.
2018-ci ildə Serj Sərkisyanın prezident səlahiyyətləri başa çatandan sonra Ermənistanda icra hakimiyyəti və dövlət idarəçiliyi sisteminə ümumi rəhbərliyi hökumət həyata keçirəcək. Yalnız dövlət başçısı funksiyasını daşıyacaq prezidenti isə parlament seçəcək.
